Алматыда тәртіп сақшылары бір тәулік ішінде көлікті мас күйінде басқарған жеті жүргізушіні анықтады. Тағы бір азамат көлік жүргізу құқығынан айырылғанына қарамастан рөлге отырған.
Ереже бұзушылықтардың басым бөлігі қауіпті қозғалыспен байланысты болды. Дұрыс маневр жасамаудың, соның ішінде қатардан қатарға кілт ауысудың («шашка») 59 жағдайы тіркелді. Сондай-ақ сегіз жүргізуші қарсы бағыттағы жолаққа шығып кеткен.
Әдеттегі заңбұзушылықтар да аз емес: қозғалыс барысында 32 адам телефонмен сөйлессе, 79 жүргізуші қауіпсіздік белдігін тақпаған.
Прокуратура өкілдері көлікті есірткіге елітіп айдаған жүргізуші туралы жеке атап өтті. Оның ағзасынан мефедрон табылған. Бұл азаматқа қатысты ӘҚБтК-нің 608-бабының 1-бөлігі бойынша әкімшілік хаттама толтырылды.
Тағы бір оқиға кәмелетке толмаған баланың рөлге отыруына қатысты болды. Осыған байланысты көлік иесі ӘҚБтК-нің 612-бабының 5-бөлігіне сәйкес жауапқа тартылды. Ал жасөспірімнің заңды өкілі 127-бап бойынша жауапкершілік арқалады.
Бір тәулік ішінде барлығы 16 автокөлік арнайы тұраққа қойылды.
Алматы жолдарындағы тексеріс мұнымен аяқталмайды. Қалада мұндай рейдтер тұрақты түрде өткізіліп тұрады. Әсіресе жол апатына әкеп соқтыруы мүмкін және басқа да қозғалысқа қатысушыларға нақты қауіп төндіретін ереже бұзушылықтарға баса назар аударылмақ.
Бұл туралы қалалық прокуратураға сілтеме жасап SHYNDYK.KZ хабарлайды. Ең өзекті және маңызды жаңалықтарды біздің сайттан оқи аласыздар.
