Қаражат үш жылға бөлінеді: 2027 жылы 2 трлн теңге, ал 2028 және 2029 жылдары 1,5 трлн теңгеден бағытталмақ. Ақша әлеуметтік, коммуналдық, энергетикалық және көлік инфрақұрылымы нысандарына жұмсалады.
Сүлейменовтің айтуынша, Ұлттық банк алдағы шығындарды экономикалық модельдерге енгізіп, базалық мөлшерлеме жөніндегі шешімдерді қабылдау кезінде ескерген. Экономика көлемі болжам бойынша 200 трлн теңгеден асатындықтан, бөлінетін қаражат инфляцияны айтарлықтай жеделдетпеуге тиіс.
«Біз инфляцияға қандай да бір төтенше немесе аса үлкен әсер болады деп күтпейміз. Базалық мөлшерлеме бойынша бүгінгі және алдағы шешімдерде бұл толық ескеріледі», — деді Ұлттық банк басшысы.
Ол қаражатты тиімді пайдалану негізгі талап екенін атап өтті. Инфрақұрылымдық жобалар елдің өндірістік әлеуетін арттырып, қосылған құн қалыптастыруға және бюджетке салық түсімдерін көбейтуге тиіс.
Алдағы шығындарға қарамастан, Үкімет болжамы бойынша Ұлттық қордың активтері 2029 жылға қарай ұлғаяды. Қор мұнай компанияларынан түсетін салықтар мен бағалы қағаздарға салынған инвестициялардан алынатын кіріс есебінен толықтырыла береді.
