ЕҚЫҰ Демократиялық институттар және адам құқықтары жөніндегі бюросының миссиясы алдағы Құрылтай сайлауына дайындықтың бірқатар маңызды аспектісіне оң баға берді.
SHYNDYK.KZ хабарлағандай, халықаралық байқаушылар өздерінің аралық есебінде сайлаушыларды ақпараттандыру бойынша ауқымды науқанды және Орталық сайлау комиссиясы жұмысының ашықтығын ерекше атап өтті.
Елімізде сайлау процедураларын түсіндіруге баса назар аударылған. Азаматтарға сайлау өтетін күн, тіркелу, үйде дауыс беру және есептен шығару куәліктерін алу тәртібі туралы ұдайы ақпарат беріліп жатыр. Алғаш рет дауыс беретін жастармен жеке түсіндіру жұмыстары жүргізілуде.
Халықаралық сарапшылар сайлауалды науқанда әлеуметтік желілердің белсенді қолданылып жатқанын да тіркеді. Платформалар саяси пікірталастар жүргізу, ақпарат тарату және электорат назарын аудару үшін басты алаңға айналған.
Құжатта ОСК-ның тұрақты түрде ашық отырыстар өткізіп, қабылданған шешімдерді жедел жариялап отыратыны және өз жұмысын заңнамадағы соңғы өзгерістерге толық сәйкестендіргені жеке көрсетілген.
Сонымен қатар, Мәдениет және ақпарат министрлігі ықтимал заңбұзушылықтарды анықтау мақсатында онлайн-кеңістікке тұрақты түрде мониторинг жүргізіп келеді. Ал билік өкілдері жалған ақпарат таратуға және кез келген шетелдік араласуға қарсы іс-қимыл шараларын белсенді түрде дамытып жатыр.
