Премьер-министр Олжас Бектенов білім беру орындарын ЖИ технологияларын енгізуге техникалық тұрғыдан дайындаудың маңыздылығына тоқталды. Мұндағы басты назар сапалы инфрақұрылыммен қамтамасыз етуге, әдістемелік қолдау көрсетуге және әсіресе ауыл мектептерінде цифрлық ортаны дамытуға аударылып отыр.
Оқу-ағарту министрі Жұлдыз Сүлейменованың баяндауынша, интернетке қолжетімділік мәселесі кешенді түрде шешіліп жатыр. Ведомство еліміздегі 8 мыңға жуық (7 971) мектептегі байланыс сапасын тексерген. Ең үлкен жаңалық — шалғайдағы 1 600 ауыл мектебінің Starlink спутниктік интернетіне қосылуы.
Оқу процесі де қатар жаңаруда. «Цифрлық сауаттылық» және «Информатика» пәндері бойынша оқу бағдарламалары жасанды интеллектіні тереңірек оқыту бағытында қайта қаралды. Енді нейрожелілер мен ЖИ-ді меңгеруге мектептерде 43 оқу сағаты бөлініп отыр. Осы уақыт ішінде оқушылар жаңа технологияларды тиімді қолданып қана қоймай, оларды пайдалану кезіндегі этикалық нормаларды сақтауды да үйренеді.
Цифрлық трансформацияға ұстаздар да дайындалуда. Ауыл мектептеріне арналып жиырмаға жуық арнайы әдістемелік ұсыным әзірленді. Оған қоса, 240 мыңға жуық қазақстандық педагог білім беру процесінде ЖИ-ассистенттермен жұмыс істеу бойынша ауқымды біліктілік арттыру курстарынан өтті.
