Associated Press мәліметінше, жыл басында Украина Қорғаныс министрлігі Зеленскийден Starlink жүйесінің Ресей аумағында жұмыс істеуіне саяси рұқсат алуға көмектесуді сұраған. Президентке SpaceX компаниясы мұндай мүмкіндік беруге келісім бергені туралы ақпарат берілді.
Зеленский осы ақпарат негізінде Трамппен сөйлескен кезде мәселені көтерген. Украина басшысы Илон Масктың SpaceX компаниясының бұған дайын екенін растады. Кейін тараптар Маскпен қосымша келіссөз жүргізіп, жобаны қаржыландыру мүмкіндігін талқылауды жоспарлаған.
Алайда келесі кездесуде, АҚШ президенті Илон Масктың мұндай келісім бермегенін хабарлады. Зеленскийдің айтуынша, Трамп оны жалған ақпарат берді деп айтыптауда.
«Ол мені алдады деп айтты. Себебі Маск Украинаға Starlink жүйесін Ресей аумағында пайдалануға рұқсат бермеген», — деді Зеленский.
Бұл кездесуден кейін Украина президенті Қорғаныс министрлігіне қайта жүгінген. Ведомство бастапқыда ұсынылған ақпараттың дұрыс болмауы мүмкін екенін мойындады.
Зеленскийдің сөзінше, Илон Маск спутниктік байланысты Ресей аумағындағы операцияларда қолдануды қауіпті эскалация деп бағалайды. Дегенмен, Украина басшысы Қорғаныс министрлігі өкілдері ақпаратты әдейі бұрмалады деп айып тақпады.
Украина қазір Starlink жүйесіне балама нұсқаларды да қарастырып жатыр. Соның бірі — Еуропаның жеке спутниктік байланыс жүйесін құру. Бұл елдің америкалық жеке компанияға тәуелділігін азайтуға мүмкіндік береді.
Starlink Украина әскері пайдаланатын негізгі байланыс құралдарының бірі саналады. Жүйені басқаратын Илон Маск негізін қалаған SpaceX компаниясы оның қандай аумақта және қандай мақсатта қолданылатынына қатысты шешім қабылдайды.
