Өңірлердің қысқа дайындығы Үкімет отырысында қаралды. Энергетика министрлігінің дерегінше, қазір электр станцияларындағы үш энергоблок, 33 қазандық және 24 турбина жөнделіп жатыр.
Электр желілерінде жоспарланған жұмыстың 91 пайызы орындалды. Барлығы 15,6 мың шақырым электр беру желісі жөнделген. Сонымен қатар 372 қосалқы станциядағы жұмыс аяқталды. Бұл жоспардың 84 пайызына тең.
Жылу желілерінің 246 шақырымы жөнделді. Алайда бұл белгіленген көлемнің 65 пайызы ғана.
Энергия көздерінің қоймаларында 4,2 миллион тонна көмір мен 137 мың тонна мазут жиналған. Отын қоры былтырғы деңгейден 2 пайызға көп.
Білім беру және денсаулық сақтау нысандарының 98 пайызы, тұрғын үйлердің 95 пайызы қысқа дайын. Бұдан бөлек, жоспарланған 1,8 мың шақырым су құбырының 1,3 мың шақырымы жөнделген. Кәріз желілерінде көзделген 306 шақырымның 225 шақырымында жұмыс аяқталды.
Олжас Бектенов жылыту маусымының басталуына бір айға жуық уақыт қалғанын еске салды. Ал солтүстік өңірлерде дайындықты аяқтауға берілетін уақыт одан да қысқа.
> «Мендегі мәлімет бойынша, бірқатар өңірде жөндеу жұмыстарын белгіленген мерзімде аяқтай алмау қаупі бар. Атап айтқанда, Көкшетау, Теміртау және Жезқазған қалаларында. Алматы және Солтүстік Қазақстан облыстарында жылу желілерін жөндеу қарқыны жеткіліксіз», – деді Премьер-министр.
Биыл энергетикалық нысандарды жөндеу мен жаңғыртуға 851 миллиард теңге бөлінген. Бұл өткен жылмен салыстырғанда 60 пайызға көп.
Бұған қоса, «Тарифті инвестицияға айырбастау» бағдарламасы аясында 384 миллиард теңгеге жуық қаражат қарастырылған. Бұл 2025 жылғы жөндеу науқанының көрсеткішінен 15 пайызға жоғары.
Үкімет басшысы осындай көлемде қаржы бөлініп отырған кезде жөндеу мерзімін кейінге шегеруге, жұмысты баяу жүргізуге және қаражатты игермей қалуға жол берілмейтінін айтты.
Олжас Бектенов энергетикалық нысандарды қысқа дайындауға жауапты өңірлік штабтардың жұмысын да сынға алды. Оның айтуынша, кей облыстарда штаб отырыстары есеп тыңдаумен ғана шектеліп отыр.
> «Жылыту маусымына осылай қарауға болмайды. Атқарылып жатқан жұмыстар тұрақты бақылауда болып, нақты басқарушылық шешімдер қабылдануға тиіс», – деді Олжас Бектенов.
Энергетика министрлігіне жөндеу жұмыстарының бекітілген кестеден ауытқымауын бақылау тапсырылды. Мерзімді ұзартудың әрбір дерегі бойынша әкімшілік шара қабылданып, жұмысты созуға жол берген басшылардың әрекетіне баға берілуі керек.
Елімізде энергетикалық кәсіпорындарға әзірлік паспортын беру рәсімі басталды. Әкімдер нысандардың қысқа дайындығын тексеретін комиссиялардың жұмысына өздері қатысуға тиіс.
Өңір басшылары энергия көздері мен жылу және электр желілерінің жағдайын тұрақты тексеріп, жөндеу барысы мен қажетті материалдардың жеткілікті болуын бақылауы керек. Жылыту маусымын әзірлік паспортынсыз бастаған жауапты тұлғалар жауапқа тартылады.
Энергетика министрлігі мен әкімдіктерге жылу көздері мен жылу желілеріндегі жөндеуді толық аяқтау міндеті жүктелді. «Самұрық-Энерго» жөндеу науқанын уақытында аяқтап қана қоймай, жаңа қуаттарды да белгіленген мерзімде іске қосуға тиіс. KEGOC электр беру желілері мен қосалқы станцияларды бекітілген кестеге сай жөндеуі керек.
Энергетика министрлігі мен әкімдіктер 1 қыркүйекке дейін әлеуметтік мазут жеткізу кестесін бекітуге міндетті. Сондай-ақ «Қазақстан темір жолымен» бірге көмір мен мазуттың энергетикалық нысандарға уақытында жеткізілуін қамтамасыз етуі қажет.
Білім беру және денсаулық сақтау нысандары 1 қыркүйекке дейін толық дайын болуы керек. Солтүстік, орталық және шығыс өңірлердегі инженерлік инфрақұрылым мен тұрғын үй-коммуналдық шаруашылық нысандары 15 қыркүйекке дейін жылу беруге әзір тұруға тиіс. Қалған аймақтар үшін белгіленген мерзім – 15 қазан.
Жұмысы кешеуілдеген әкімдіктерге анықталған мәселелерді жедел шешу тапсырылды. Жылыту маусымы бекітілген кестеге сәйкес басталуы керек. Сонымен бірге жергілікті атқарушы органдар ауа райын ескеріп, күн күрт суытқан жағдайда дер кезінде әрекет етуге міндетті.
