Құттықтауында Президент бұл айтулы датаның қырғыз халқының еркіндікке, егемендік пен тәуелсіздікке деген ұмтылысын білдіретінін жоғары бағалады.
– Бұл айтулы мереке қырғыз халқының еркіндікке, дербестік пен тәуелсіздікке ұмтылысын айшықтайды. Осы жылдар ішінде Қырғызстан ел болып еңсе тіктеуден бастап, орнықты дамуға дейінгі жолды абыроймен еңсерді. Мемлекеттіліктің іргесін бекітіп, бай рухани мұрасын сақтап қалды. Халықаралық аренада беделді елге айналды, – деп жазылған құттықтау жеделхатында.
Қасым-Жомарт Тоқаев Қырғыз Республикасының 2027–2028 жылдарға БҰҰ Қауіпсіздік Кеңесінің тұрақты емес мүшесі болып сайлануын елдің халықаралық деңгейдегі маңызды жетістіктерінің бірі ретінде атап өтті.
Сонымен қатар Мемлекет басшысы Қазақстан мен Қырғызстанды ғасырлар бойы қалыптасқан достық пен тату көршілікке негізделген бауырластық қарым-қатынастар байланыстыратынын айтып, екі ел арасындағы стратегиялық серіктестік пен одақтастықтың алдағы уақытта да қарқынды нығая беретініне сенім білдірді.
Соңында Қазақстан Президенті Садыр Жапаровқа жауапты мемлекеттік қызметіне табыс, ал бауырлас қырғыз халқына құт-береке мен өркендеу тіледі.
