Алматыдағы Аюсай шатқалында 30 тамызда жоғалып кеткен 11 жастағы бала бір тәулікке созылған іздеу жұмыстарынан кейін аман-есен табылды. Ол шамамен 2000 метр биіктіктен табылған. Іздеу жұмыстарына 160-қа жуық адам, кинологтар, дрондар және «Қазавиақұтқару» тікұшағы жұмылдырылды.
Іздеу операциясына құтқарушылар, полиция қызметкерлері, әскери қызметшілер, орманшылар және еріктілер қатысты.
Құтқарушылар шатқалдың алты шақырымнан астам аумағын және Үлкен Алматы өзенінің арнасын тексерді. Баланы құтқарушылар мен еріктілерден құралған бірлескен топ тапты.
Бала қорқып қалған. Оған су беріп, кейін қалаға жеткізіліп, ата-анасына тапсырылды.
