Жиынға партияның өңірлік филиалдары, қазақстандық өндірушілер және шағын әрі орта бизнес өкілдері онлайн форматта қосылды.
Қатысушыларға стейблкоиндер мен компания активтерімен қамтамасыз етілген инвестициялық токендерді пайдалану мүмкіндіктері таныстырылды. Атап айтқанда, кәсіпорындардың мүлкі, технологиялары, патенттері және басқа да зияткерлік меншік нысандары негізінде токендер шығару мәселесі қаралды.
Global ESG Partnership өкілдерінің айтуынша, мұндай құралдар кәсіпорындарға инвесторларға бизнесті басқару құқығын бермей және белгіленген кірістілік бойынша міндеттеме алмай-ақ ішкі және шетелдік инвестиция тартуға мүмкіндік береді.
Сонымен бірге қатысушылар саланы реттеудегі бірқатар олқылыққа назар аударды. Олардың қатарында токендер бойынша міндеттемелерді бухгалтерлік есепте көрсету, инвесторларды қорғау және тәуекелдерді хеджирлеу тетіктері бар. Цифрлық қаржы құралдары жаңа бағыт болғандықтан, заңнаманы одан әрі жетілдіру қажет екені айтылды.
Кездесуде «Астана» халықаралық қаржы орталығы, Қазақстан қор биржасы және Alatau City алаңдарында жобаларды дамыту келешегі де талқыланды. Қатысушылардың пікірінше, блокчейн технологиялары банк несиелері мен дәстүрлі қор нарығымен қатар отандық бизнес үшін капитал тартудың қосымша тәсіліне айналуы мүмкін.
Партия өкілдері «Ақ жолдың» криптоиндустрияны дамыту мәселесін 2017 жылдан бері көтеріп келе жатқанын еске салды. 2025 жылы фракция Қазақстанда криптоактивтер нарығын дамыту және криптобанк құру жөнінде ұсыныстар айтқан.
Қазір Ұлттық банк стратегиялық крипторезерв қалыптастыруға арналған Цифрлық активтердің мемлекеттік қорын дамыту жұмыстарын жүргізіп жатыр. Сондай-ақ цифрлық активтерді төлем және инвестиция құралы ретінде пайдалану бағыты ілгерілетілуде.
«Ақ жол» партиясы цифрлық технологиялардың мүмкіндіктерін кәсіпкерлерге түсіндіру жұмыстарын жалғастыратынын мәлімдеді. Мұндай құралдар бизнесті қаржыландырудың балама көзіне айналуы мүмкін.
