Жаңаөзенде күйік бөлімшесін жабдықтауға арналған қаражаттың жұмсалуына қатысты қылмыстық іс тергеліп жатыр. Қаржылық мониторинг агенттігінің мәліметінше, жобаға қарастырылған 223 млн теңгенің 92 млн теңгесі ғана медициналық жабдық алуға жұмсалған.
Іс материалдарына сәйкес, 2025 жылы Маңғыстау облысының Денсаулық сақтау басқармасы жаңа бөлімше ашу үшін «ҚазМұнайГаз» компаниясынан демеушілік қолдау сұраған. Қажетті қаржы кейін «ӨзенМұнайГаз» арқылы «Жарылқау» қоғамдық қорына берілген.
Алғашқы жоспар бойынша ауруханаға медициналық техниканың сегіз түрін жеткізу және медицина қызметкерлерін оқыту қарастырылған. Кейін келісім шарттары өзгеріп, оның орнына екі арнайы медициналық кереует сатып алу туралы келісім жасалған. Олардың жалпы құны 210 млн теңге болған.
ҚМА бұл сатып алудың белгіленген талаптарды сақтамай жүргізілгенін хабарлады. Мұндай құндағы медициналық жабдықтарды қолданыстағы тәртіп бойынша Бірыңғай дистрибьютор арқылы алу қажет.
Тергеу нұсқасына сәйкес, жабдықтың нақты құны 92 млн теңгені құраған. Қалған қаражат үлестес ұйымдардың көмегімен қолма-қол ақшаға айналдырылып, бірнеше адам арасында бөлінуі мүмкін.
Іске Жаңаөзен көпбейінді қалалық ауруханасы директорының орынбасары, «Жарылқау» қорының басшысы, қала әкімінің бұрынғы орынбасары және жеткізуші компания өкілі қатысы болуы мүмкін деген күдік бар.
Сонымен қатар, тергеу барысында жеткізуші компания өкілі қылмыстық жолмен алынған қаражатқа Астанадан жылжымайтын мүлік сатып алып, оны басқа адамдардың атына рәсімдегені анықталған.
Жаңаөзен қаласы әкімінің бұрынғы орынбасарына қатысты ҚР ҚК-нің 361-бабы бойынша қылмыстық іс қозғалған. Аталған бап лауазымдық өкілеттіктерді теріс пайдалануға қатысты.
Үш күдікті қамауға алынған. Сот олардың мүлкіне тыйым салу туралы шешім шығарды. Бұғатталған активтердің қатарында екі пәтер, екі үй және автокөлік бар.
Қазір тергеу жалғасып жатыр. ҚМА өзге мәліметтерді ҚР ҚПК-нің 201-бабына сәйкес жариялауға болмайтынын атап өтті.
