Бұл туралы Экология және табиғи ресурстар министрі Әлібек Қуантыров республикалық бюджет жобасын талқылау барысында айтты. Министрдің сөзінше, киік санының шамадан тыс көбеюі ауыл шаруашылығына қиындық туғызып отыр. Сондықтан олардың санын реттеу қажет.
Негізгі мәселе – ет комбинаттарының көп мөлшердегі шикізатты қабылдап, өңдеуге қауқарсыздығы. Бұған дейін киік жаппай атылған кезде кәсіпорындар етті уақытында өңдеп үлгермеген. Соның салдарынан өнімнің бір бөлігі пайдаланылмай қалған. Енді киік тек ет өңдейтін зауыттардың өтінімі негізінде, олардың қабылдау мүмкіндігі ескеріліп атылады.
Министр Қазақстанда киік етіне сұраныс бар екенін де атап өтті. Дегенмен бұл өнім халықтың күнделікті тұтынатын тағамдарының қатарына кірмейді.
Алдағы уақытта киік санын реттеуге аңшылық шаруашылықтарын тарту мәселесі қарастырылуы мүмкін. Ол үшін арнайы лицензия беру тетігі талқыланып жатыр. Алайда Қуантыров аңшылардың көмегімен мәселені толық шешу мүмкін емес деп есептейді. Өйткені саны реттелуі тиіс киіктер жүздеген мыңға жетеді.
Бұған дейін SHYNDYK.KZ биылғы маусымда шамамен 580 мың киікті ату жоспарланғанын хабарлаған. Алайда етті сатуда қиындықтар туындаған. Бір келісі 1,5–2,5 мың теңгеден ұсынылғанына қарамастан, қоймаларда өтпей қалған өнім жиналып жатыр.
Бұған киік етін дайындаудың өзіндік ерекшеліктері, тұтынушылардың өнім туралы жеткілікті білмеуі және сауда орындарының аздығы әсер етіп отыр. Қазір киік еті еліміздің бес өңірінде ғана сатылады. Ал ірі супермаркеттер желілерінде бұл өнім іс жүзінде кездеспейді.
