Қаржылық мониторинг агенттігінің (ҚМА) қызметкерлері Астанада 170 жылжымайтын мүлік нысанын заңсыз иемдену әрекетінің жолын кесті. Жалпы құны 4,4 млрд теңгеден асатын пәтерлер көпбалалы отбасыларға, жетім балаларға, мүгедектігі бар адамдарға және басқа да әлеуметтік осал санаттағы азаматтарға арналған.
Тергеу мәліметтеріне сәйкес, қылмыстық схеманы «Төленді» ТҚК бұрынғы басшысы А. Байжұманов ұйымдастырған. Еске сала кетейік, ол 2016 жылы 1,5 мың үлескердің 10 млрд теңгесін жымқырғани үшін сегіз жылға бас бостандығынан айырылған болатын.
Тергеушілердің пайымдауынша, түрмеден шыққаннан кейін Байжұманов сыбайластарымен бірге жаңа алаяқтық жоспар құрған. Қаскөйлер іс жүзінде жылжымайтын мүлік сатып алмаған адамдардың атына артқы күнмен үлес жарналарының жалған шарттарын рәсімдеген. Одан кейін қылмыстық істер мен сот шешімдері арқылы пәтерлерге заңды құқық алу үшін осы «жалған үлескерлердің» атынан алаяқтық туралы арыз түсіріп отырған. Болашақта олар пәтерлерді сатып, түскен пайданы бөліп алмақ болған.
Қылмыстық схемаға барлығы 80-нен астам жалған үлескер тартылған. Бұдан бөлек, алаяқтар қолдан жасалған шарттарды нақты азаматтарға да сатып үлгерген, оларға келтірілген шығын көлемі 400 млн теңгеден асады.
Бұл атышулы іске қазіргі полиция қызметкерлерінің де қатысы бар екені анықталды. Тәртіп сақшыларына қатысты қызметтік өкілеттіктерін асыра пайдалану және дәлелдемелерді бұрмалау фактілері бойынша жеке тергеу басталды.
Қазіргі уақытта 19 адам күдікті ретінде танылып, оның тоғызы қамауға алынды. Күдіктілердің жалпы құны 250 млн теңгеден асатын мүлкіне бұғат қойылды. Сотқа дейінгі тергеп-тексеру аяқталып, тараптар іс материалдарымен танысуға кірісті.
