Астанада өткен Aviation Security Week форумында Көлік вице-министрі Талғат Ластаев мұхит асатын тікелей рейстердің қашан ашылатыны туралы айтып берді. Оның сөзіне сүйенсек, АҚШ-қа тікелей ұшу үшін ең алдымен америкалық тараптың ресми рұқсаты қажет.
Жақында ғана Қазақстанға АҚШ-тың Азаматтық авиация федералды басқармасының (FAA) мамандары келіп, арнайы тексеріс жүргізген. Алдын ала бағалау қорытындысы еліміздің авиация жүйесінің халықаралық талаптарға толық сай екенін көрсетті. Шетелдік сарапшылардың түпкілікті есебі қараша айында шықпақ. Көлік министрлігі осы жылдың соңына дейін Америкаға ұшу құқығына ие боламыз деп үміттеніп отыр.
Екінші маңызды мәселе – алыс қашықтыққа ұшатын әуе кемелерін алдыру. Желтоқсан айында елімізге су жаңа Boeing Dreamliner ұшағы жеткізілмек. Бұл бортпен белгілі бір уақыт ұшып, міндетті тәжірибе жинақтағаннан кейін, барлығы жоспарға сай өтсе, 2027 жылы Астана мен Нью-Йорк арасында тікелей әуе қатынасы ресми түрде іске қосылады.
