Абай облысының Мақаншы ауданына қарасты Қабанбай ауылдық округінде қамыс пен қураған шөптен шыққан алапат өртті ауыздықтау жұмыстары жалғасуда. Төтенше жағдайлар министрлігінің хабарлауынша, өрт ошағы Қабанбай ауылынан 22 шақырым қашықтықтағы Ұзынбұлақ телімінде тіркелген.
Тілсіз жауды сөндіруге қатты жел мен батпақты жер қатты кедергі келтіріп отыр. Кей жерлерде бойы үш метрге дейін жететін ну қамыстың кесірінен өрт сөндіру техникасы мен мамандардың қызыл жалынның ортасына жақындауы қиындаған. Қазір өртпен күреске 100-ден аса құтқарушы мен 30-ға жуық техника жұмылдырылды. Оқиға орнында Абай мен Жетісу облыстарының ТЖД бөлімшелері, «Ауыл құтқарушылары» бекеті және жергілікті әкімдік өкілдері тынымсыз жұмыс істеп жатыр.
Құтқарушылардың жедел әрекетінің арқасында жалынды шаруа қожалығының тұрғын үйіне және қамбада жиналған 30 тоннаға жуық шөпке жеткізбей, аман алып қалды. Төтенше жағдайлар министрлігінің мәліметінше, жақын маңдағы елді мекендерге ешқандай қауіп төніп тұрған жоқ. Өртті толықтай ауыздықтау жұмыстары жалғасуда, жағдай министрліктің қатаң бақылауына алынған.
