Кәрім Мәсімовтің бұрынғы күйеу баласы Азамат Қапенов Қазақстаннан 500 млн доллар өтемақы талап етіп отыр. Саясаттанушы Ералы Нұржұма бұл соманың негізділігіне күмән келтіріп, нақты шығын көлемі жан-жақты дәлелденуі керек екенін айтты. Сарапшы өз пікірін SHYNDYK.KZ редакциясына білдірді.
Ералы Нұржұманың айтуынша, Қапеновтың «Достық» және «Алтынкөл» теміржол терминалдары мен вагон паркіне құйған қаржысы шамамен 54 млн доллар болған. Ал мемлекеттен сұрап отырған өтемақысы одан тоғыз еседен астам көп. Саясаттанушы мұндай соманы талап ету үшін тек салынған инвестицияны көрсету жеткіліксіз екенін, кәсіпкер қандай шығынға ұшырағанын және қанша табыстан қағылғанын құжатпен дәлелдеуі қажет екенін атап өтті.
Сарапшы бұл дауды молдовалық Стати кәсіпкерлерінің Қазақстанға қарсы ісімен салыстыруға да қарсы. Стати ісінде «Боранкөл» мен «Толқын» мұнай-газ кен орындары және газ өңдеу зауыты қарастырылған. Ал Қапеновтың активтері теміржол тасымалы мен логистика саласына қатысты. Нұржұманың пікірінше, қызмет бағыты мен табыс табу мүмкіндігі әртүрлі нысандарды бірдей бағалау дұрыс емес.
Саясаттанушы кәсіпкердің Қазақстанға қайта оралып, жұмысын жалғастырғысы келетіні туралы мәлімдемелеріне де тоқталды. Оның пайымынша, 500 млн долларлық талап мемлекетпен келіссөз жүргізу барысында ықпал ету құралы ретінде қолданылуы мүмкін. Алайда бұл болжам ғана, Қапеновтың нақты мақсаты жөнінде кесімді пікір айтуға негіз жоқ.
Ералы Нұржұма мемлекеттік органдар талаптың заңдылығын, қаржылық есептерін және Қазақстан үшін ықтимал салдарын мұқият тексеруі тиіс деп есептейді. Оның айтуынша, 500 млн доллар талап етілгенімен, бұл қаражат міндетті түрде төленеді деген сөз емес. Дау халықаралық арбитражға жеткен жағдайда кәсіпкер өтемақы сұрауға заңды негізі бар екенін және талап еткен сомасының қалай есептелгенін дәлелдеуі керек.
