Әлеуметтік желіде сүндет тойда түсірілген видео қызу талқыланып жатыр. Бейнежазбада ересек адам сүндеттелген балаға бата береді. Алайда оның айтқан тілегі көпшіліктің наразылығын тудырды.
Видеода ер адам баланың жыныс мүшесіне қатысты әдепсіз сөздер айтып, оның «әдемі, тұрғыш, ұрғыш, жүргіш» болуын тілейді. Желі қолданушылары мұндай сөздердің балаға арналған батада айтылуын орынсыз деп бағалады.
Пікір қалдырғандар ұлттық дәстүр мен әдептің ара-жігін ажырату қажет екенін жазуда. Олардың айтуынша, сүндет той — балаға ақ тілек айтылып, қуаныш бөлісетін мереке. Сондықтан бата кезінде баланың жасына сай келмейтін, жыныстық астары бар сөздерді қолдану дұрыс емес.
Кейбір қолданушылар мұндай сөздерді әзілге немесе салт-дәстүрге жатқызуға болмайтынын айтып, оқиғаға құқықтық баға беруді ұсынды.
Әзірге видеодағы ер адамның кім екені, тойдың қай жерде және қашан өткені туралы нақты мәлімет жоқ.
