Қазақстанда тау-кен өнеркәсібі қалдықтарының құрамындағы пайдалы компоненттердің қорын бағалап, оларды қайта өңдеу ісін қолға алу қажет. Бұл туралы «Әділет» партиясының Құрылтайдағы депутаты Марат Шибутов Өнеркәсіп және құрылыс министрі Ерсайын Нағаспаевқа жолдаған сауалында мәлімдеді.
Халық қалаулысының сөзіне сүйенсек, елімізде қатты пайдалы қазбаларды өндіру ХІХ ғасырдың екінші жартысынан бері жүргізіліп келеді. Осы 150 жыл ішінде миллиардтаған тонна кен қалдығы жиналған. Бұрынғы кәсіпорындар тек сапалы әрі бай шикізатты ғана пайдаланып, қалғанын далаға тастайтын. Ал қазіргі озық технологиялардың көмегімен сол ескі үйінділерден қыруар пайда табуға болады. Оған қоса, уақыт өте келе геохимиялық процестердің әсерінен қалдықтар арасында пайдалы элементтердің шоғырлануы да арта түседі.
Шибутов бұл шикізаттың дайын тұрғанын, яғни оның баяғыда ұсақталып, жер бетіне шығарылғанын басты артықшылық ретінде атап өтті. Бұл жаңа кен орнын игеруден гөрі әлдеқайда оңай әрі тиімді. Депутаттың пікірінше, мұндай қорларды кәдеге жарату ескі тау-кен кәсіпорындарының жұмысын жандандырып, соған тәуелді моноқалалардың экономикасын ұстап тұруға мүмкіндік береді. Сондай-ақ қайта өңдеу жұмыстары қалдық көлемін азайтып, босаған жерлерді шаруашылыққа қайта қосуға және аймақтың экологиясын тазалауға зор үлес қоспақ.
