Астанада «Пепе» деп аталатын есірткі сататын интернет-дүкеннің қызметі тоқтатылды. Тұтынушыларға ұсынылған тауарлардың арасында құрамында каннабис шайыры бар печенье де болған. Арнайы операция барысында бес ер адам ұсталды.
Ішкі істер министрлігінің мәліметінше, операция Мемлекеттік күзет қызметімен бірлесіп жүргізілген. Күдіктілер жалдамалы пәтерлерде қолға түскен. Тергеу деректеріне сәйкес, топ мүшелерінің әрқайсысы белгілі бір міндет атқарған. Бірі заңсыз сауданы ұйымдастырса, қалғандары есірткіні сақтау, қаптау және тарату жұмыстарымен айналысқан.
Интернет-дүкен арқылы печеньеден бөлек, марихуана, гашиш және каннабис шайыры сатылған. Тінту кезінде полицейлер құрамында есірткі бар 238 печенье мен жалпы салмағы 12 келіге жуық түрлі есірткі заттарын тәркіледі.
Сонымен қатар қолма-қол ақша, банк карталары, ұялы телефондар, электронды таразылар және есірткіні қаптауға арналған жабдықтар табылған.
Қазіргі уақытта бес күдікті де қамауға алынды. Есірткінің заңсыз айналымына қатысты сотқа дейінгі тергеу жалғасып жатыр. Күдіктілердің әрекетіне түпкілікті құқықтық баға сот шешімімен беріледі.
