R.O.I. тұтынушылар кооперативіне мүше болған азаматтарға су жаңа көліктер мен пәтерлер уәде етілген. Алайда, тергеу мәліметтеріне сәйкес, салымшылардың ақшасы басқа қатысушыларға төлем жасау үшін пайдаланылған. Салдарынан 275 адам жәбірленуші деп танылып, жалпы шығын көлемі 217 миллион теңгені құрады.
Қаржылық мониторинг агенттігінің мәліметінше, ұйымдастырушылар үлестес тұлғалардың, соның ішінде «Кәусар» ЖК шоттарына 94 миллион теңге аударып жіберген. Бұл ақша аударымдары консультациялық қызметтерге ақы төлеу ретінде рәсімделіпті.
2022 жылы сот даулары басталған кезде, Алматыда тағы алты тұтынушылар кооперативі (ShynSaulet, Berekeli Shanyrak, Aya-Aru, Jasmin, USCoop және Baiterek) пайда болған. Тергеушілер бұл ұйымдар жеке сот орындаушылары бұғаттаған R.O.I. шоттарын айналып өтіп, ақшаны басқа жаққа бағыттау үшін құрылған деп есептейді.
Қазіргі таңда пирамиданы ұйымдастырушы екі айға қамауға алынды. Сот шешімімен оның үш көлігі, 25 пәтері және банктегі шоттарына тыйым салынды.
Тергеу амалдары жалғасуда. ҚР Қылмыстық-процестік кодексінің 201-бабына сәйкес істің өзге де мән-жайлары жария етілмейді.
