Түркістан облысының 19 жастағы тұрғынының әскерден кейін балдақпен үйіне оралғаны туралы ақпарат әлеуметтік желіде тарады. Қазір жас жігітке ота қажет.
Сарбаздың анасының айтуынша, ұлының жамбас буынында туа біткен патология болған. Ол бұл туралы әскерге шақырылғанға дейін ескерткенін айтады. Алайда 2025 жылдың қарашасында жас жігіт Қонаевтағы №58012 әскери бөліміне мерзімді әскери қызметке жіберілген.
Анасының сөзінше, шамамен екі айдан кейін ұлының аяғы ауырып, жүрісі қиындаған. Әскерге шақырылғанға дейін денсаулығына қатысты мәселе болғанын отбасы айтып отыр.
Қорғаныс министрлігі жағдайға қатысты басқа мәлімет берді. Ведомствоның мәлімдеуінше, әскерге шақырылар алдында жас жігіт денсаулығына шағымданбаған, ал медициналық комиссия оны әскери қызметке жарамды деп таныған.
Әскерде денсаулығына қатысты шағымдар пайда болғаннан кейін сарбаз тексеруден өтіп, ауруханаға жатқызылған. Дәрігерлер оның буындарында туа біткен патология бар екенін, сондай-ақ зәр шығару жүйесіне қатысты аурулар анықталғанын хабарлады.
Кейін әскери-дәрігерлік комиссия жас жігітті әскери қызметке жарамсыз деп танып, денсаулық жағдайына байланысты белгіленген тәртіппен қызметтен босатқан.
Отбасының айтуынша, қазір сарбазға ота қажет. Алайда олар қажетті емнің ақысын өздігінен төлеуге мүмкіндігі жоқ екенін мәлімдеді.
