Отбасы банкінің мәліметінше, 3 қараша күні қазақстандық әйелдер жалпы сомасы 20 млрд теңгеге 850 өтінім берген. Оның 352-сі банк кеңесшілерінің көмегімен рәсімделген.
Түскен өтінімдердің барлығы алдын ала мақұлданған. Енді бағдарламаға қатысушылар өздеріне қолайлы баспана таңдап, ипотекалық қарызды рәсімдеуге кірісуі керек. Бұл жұмыстарды аяқтауға бір ай уақыт берілген.
Айта кетейік, «Ұмай» бағдарламасына сұраныс бұған дейін де жоғары болған. 31 тамызда басталған алғашқы кезеңде де бөлінген қаржы бір күннің ішінде толық үлестірілген еді.
«Ұмай» бағдарламасы әйелдердің ипотекалық несие арқылы жеке баспана сатып алуына мүмкіндік беруге бағытталған. Қаражаттың қысқа мерзімде таусылуы елдегі қолжетімді баспанаға деген сұраныстың әлі де жоғары екенін көрсетеді.
Әзірге бағдарлама бойынша өтінім қабылдаудың қайта қашан басталатыны хабарланған жоқ.
