Кездесуде Қазақстандағы жобаларды жүзеге асыруға ADCB Group-ты кеңінен тарту мәселесі талқыланды. Тараптар экономиканың нақты секторын дамыту мен цифрлық инфрақұрылымды жаңғыртуға басымдық берді.
Фарух Әл Марзукидің айтуынша, банк энергетика және теміржол инфрақұрылымын қаржыландырып, мұнай химиясы, көлік және логистика салаларындағы келісімдерді іске асыруға қатысып келеді.
Соңғы 15 жылда ADCB Kazakhstan 100-ден астам бизнес бастамаға қаржылай қолдау көрсеткен. Оның шамамен 90%-ы шағын және орта бизнес жобаларына тиесілі.
Олжас Бектенов кейінгі 20 жылда Біріккен Араб Әмірліктерінен Қазақстанға 7 млрд доллардан астам инвестиция салынғанын атап өтті. Соның 3 млрд долларға жуығы соңғы екі жарым жылда келген.
ADCB Group БАӘ мен Таяу Шығыстың өзге елдерінен инвестор тартуға көмектесіп, қазақстандық жобалардың сыртқы қаржы көздерін көбейте алады.
Кездесуде елде жүргізіліп жатқан экономикалық және институционалдық реформалардың инвестициялық тартымдылыққа әсері де сөз болды. Президент Қасым-Жомарт Тоқаевтың тапсырмасымен Қазақстанда жаңа инвестициялық кезең басталып, инвесторларды белсенді іздеу және тарту тетігі енгізілді.
Келіссөз соңында тараптар бірлескен жұмысты жалғастыруға ниетті екенін білдірді.
