Маңғыстау облыстық балалар ауруханасында науқастардың бірінің әкесі жанжал шығарды. Баласына көрсетілген ем-домға көңілі толмаған ер адам медицина қызметкеріне қол жұмсаған. Оқиға 31 қазан күні болған, ал оның видеосы кешеден бері әлеуметтік желілерде қызу талқыланып жатыр, деп хабарлайды SHYNDYK.KZ.
Куәгерлердің айтуынша, қызыл күрте киген келуші өзін өте агрессивті ұстаған: ол үстелді теуіп қалғанда, қасында тұрған бөтен балаға тиіп кете жаздаған. Бұдан кейін ол дәрігерге тап беріп, алқымынан қылғындырған. Оқиғаны көргендердің сөзінше, бұл сәтте медицина маманы өзінің тікелей қызметтік міндетін атқарып жүрген.
Бұл жайт ауруханадағы өзге де келушілердің, әсіресе баласын қаратқалы келген ата-аналардың үрейін ұшырды. Куәгерлердің мәліметінше, ашуға мінген ер адам жиһаздарды жан-жаққа лақтырып, маңайдағы кішкентай пациенттердің өміріне қауіп төндірген.
Маңғыстау облыстық Полиция департаменті бұл оқиғаны растады. Аталған жағдайға байланысты қылмыстық іс қозғалып, тергеу амалдары жүргізіліп жатыр. Құқық қорғау органдарының ресми ақпаратына сүйенсек, жанжал салдарынан бір адамның зардап шеккені тіркелген.
