Бейнебақылау камераларына түсіп қалған оқиға 16 қазан күні болған. Кадрлар әлеуметтік желілерде тез тарап, қоғамда үлкен резонанс тудырды.
Маңғыстау облысының білім басқармасы даулы видеодағы әйел оқу орны иесінің жұбайы екенін және оның осы мектепте жұмыс істегенін растады. Ведомствоның мәліметінше, жанжал еден жуушының директор кабинетін жинаудан дөрекі түрде бас тартып, бөлмеден шығып кетуінен басталған. Осыған ашуланған қызметкер шелекті теуіп, суды дәлізге шашып жіберген.
Тексеріс қорытындысы бойынша тәртіп бұзған әйелге алдымен педагогикалық әдепті сақтамағаны үшін сөгіс жарияланып, кейін мектеп басшылығы онымен еңбек шартын бұзды. Оқиғаға құқықтық баға беру үшін іс материалдары Ақтау қалалық полициясына жолданды.
SHYNDYK.KZ редакциясы Маңғыстау облысының Полиция департаментіне аталған факті бойынша арыздың тіркелген-тіркелмегенін, тексеру амалдарының жүргізіліп жатқанын және жанжалға қатысушыға қандай шара қолданылатынын білу мақсатында ресми сауалнама жіберді.
