Әлеуметтік желіде Павлодар облысының Ертіс ауылындағы Александр Невский шіркеуінің қызметкері Андрей Андреевтің Інжілден үзінді оқыған видеосы тарады.
Бейнежазба көпшіліктің назарын аударып, түрлі пікір туғызды. Кейбір желі қолданушылары оның қазақ тілінде діни мәтін оқуын қолдаса, өзгелері мұны орынсыз деп бағалады.
«Қазақша сөйле, сөйле дегенге, бұл не енді? Бұл тым артық кетті! Халықты күлдірмеңдер!» — деп жазды пікір қалдырушылардың бірі.
Андрей Андреев өзіне айтылған сынға TikTok желісінде жауап берді. Ол Інжілді мемлекеттік тілде оқудың неліктен кейбір адамдарға ұнамағанын түсінбейтінін айтты.
«Бұл сіздерді неге соншалықты мазалайды? Біз шіркеуде заңға қайшы әрекет жасап жатырмыз ба?» — деді ол.
Дін қызметкерінің айтуынша, Қазақстанда орыс тілін білмейтін, бірақ христиан дінін ұстанып, шіркеуге барғысы келетін адамдар бар. Сондықтан тіл олардың діни сеніміне кедергі болмауы тиіс.
«Шіркеуге келген адамға алдымен орыс тілін үйретуіміз керек пе? Бұл ақылға сыймайды ғой», — деді Андрей Андреев.
Ол Киелі кітаптың, Көне және Жаңа өсиеттің, сондай-ақ дұғалар жинағының қазақша нұсқалары бар екенін атап өтті. Сондықтан әр адам өзіне түсінікті тілде құлшылық ете алады.
«Бір-бірімізді жақсы көруіміз керек. Құдайға тек бір тілде ғана дұға ету қажет деп ойламауымыз керек», — деді дін қызметкері.
