Павлодар тұрғыны қызын емдету үшін Алматыға келіп, Booking платформасы арқылы пәтер жалдаған. Алайда әйелдің айтуынша, баспана сайттағы сипаттамаға сәйкес келмеген. Тіпті пәтердің нақты мекенжайы да брондау кезінде көрсетілген мекенжайдан өзгеше болып шыққан.
Осыдан кейін әйел пәтерден мерзімінен бұрын кетуге шешім қабылдап, пайдаланылмаған бір тәулік үшін 20 мың теңгесін қайтаруды сұраған. Бірақ пәтер иелерінен жауап ала алмаған соң, Booking платформасында жағымсыз пікір қалдырған.
Көп ұзамай әйелге белгісіз нөмірлерден қоңыраулар мен дауыстық хабарламалар келе бастаған. Хабарласқан адам одан жазған пікірін өшіруді талап еткен. Әйелдің сөзінше, өзіне және баласына қоқан-лоқы көрсетілген.
Оқиға дауыстық хабарламалардың жазбалары Threads желісінде жарияланғаннан кейін көпшілікке тарады. Полиция 31 жастағы ер адамның жеке басын анықтады.
Сот оны ұсақ бұзақылық жасағаны үшін кінәлі деп танып, 10 тәулікке әкімшілік қамаққа алу туралы шешім шығарды.
