Алматыда бұрынғы әйелінің тарапынан физикалық зорлық-зомбылыққа ұшырағанын айтып, шағымданған ер адамның ісіне қатысты соталды тергеу басталды. Ер адамның сөзінше, бұрынғы жұбайы оны ұрып-соғып, бет-аузын тырнап тастайды, деп хабарлайды SHYNDYK.KZ.
Бұл оқиға туралы бұған дейін жәбірленушінің қорғаушысы Тілеужан Кішкенебаев айтып берген еді. Оның мәліметінше, ерлі-зайыптылар он жыл отасқаннан кейін ажырасып кеткен, алайда әлі күнге дейін үш бөлмелі ортақ пәтерде бірге тұрып жатыр. Ер адам бұрынғы әйелі осындай әрекеттері арқылы өзін үйден бездіріп, қуып шықпақшы деп есептейді.
Адвокаттың айтуынша, жақында оның қорғалушысы бұрынғы әйелінің «балағаттады» деген шағымы бойынша ұсақ бұзақылық үшін 10 тәулікке қамауға алынған. Ал қорғаушының пайымдауынша, ер адамның өзін ұрып-соғу фактілері бойынша түсірген шағымдары тіркелгенімен, олар бойынша ешқандай тергеу жүргізілмеген.
Қазіргі таңда Алматы полициясы ұрып-соғу фактісі бойынша соталды тергеп-тексеру жұмыстарын жүргізіп жатыр. Құқық қорғау органдары оқиғаның барлық мән-жайын анықтауда. Тергеу қорытындысы бойынша заңнамаға сәйкес тиісті процессуалдық шешім қабылданатын болады.
