Желіде тараған видео Астанадағы Ботаникалық бақ маңында түсірілген. Кадрдан қала үстімен созылыңқы пішінді нысанның қозғалып бара жатқанын байқауға болады. Оны көрген тұрғындар ұшақ немесе метеорит болуы мүмкін деген болжам айтқанымен, әзірге ешқайсысы расталмады.
Көп ұзамай Көкшетау мен Қостанайдан да осыған ұқсас хабарлар тарай бастады. Ресейдің Челябі қаласының тұрғындары да аспандағы тосын көріністі видеоға түсірген. Алайда әр қалада байқалған құбылыстың бір-біріне қатысы бар-жоғы белгісіз.
Айта кетейік, 2025 жылғы 5 маусымда да Қазақстанның бірнеше өңірінде осындай құбылыс тіркелген еді. Сол кезде Астана, Қарағанды, Павлодар және Қостанай тұрғындары аспанда жарқыраған, соңынан жарық із қалдырған нысандарды байқаған. Оның ықтимал себептерінің бірі ретінде атмосфераға енген ғарыш қалдықтарының жануы аталған болатын. Дегенмен бүгінгі құбылысты сол оқиғамен байланыстыруға әзірге негіз жоқ.
Қазіргі уақытта құзырлы органдар Астана мен басқа қалаларда байқалған нысанға қатысты ресми түсініктеме берген жоқ. Оның метеорит немесе ғарыш аппаратының бөлшегі екені де нақтыланбады.
