Жиынға өңірдің түкпір-түкпірінен мәртебелі қонақтар жиналды. Қазақстан президенті мен Иордания королінен бөлек, Астанаға Тәжікстан басшысы Эмомали Рахмон, Түрікменстан президенті Сердар Бердімұхамедов және Өзбекстан көшбасшысы Шавкат Мирзиёев келді.
Сонымен қатар, саммитке Әзербайжан Ұлттық мәжілісінің төрайымы Сахиба Гафарова, Қырғызстанның Сыртқы істер министрі Жээнбек Құлубаев және басқа да ресми тұлғалар қатысып жатыр.
Жоғары деңгейдегі талқылаудың басты тақырыбы — жасанды интеллектінің қарқынды дамуы жағдайындағы қауіпсіздік мәселесі.
Еске сала кетейік, Ақаба процесі — 2015 жылы Иордания королі бастамашы болған ланкестікке және зорлық-зомбылық экстремизмге қарсы іс-қимыл жөніндегі халықаралық бастама. Бұл алаң жаһандық қауіп-қатерлерді ортақ түсіну және оларға қарсы іс-қимылдың тәжірибелік шараларын әзірлеу үшін мемлекет басшыларын, күштік құрылымдар мен арнайы қызметтердің, сондай-ақ халықаралық ұйымдардың жетекшілерін біріктіреді.
