Алғашында Токсанбаева жарыс жеңімпазы деп жарияланған еді. Қазақстандық спортшы 42,195 шақырымды 3 сағат 22 минут 20 секундта жүріп өтіп, барлық қарсыласынан озып шықты.
Мәреден кейін оның нәтижесіне қатысты наразылық берілді. Қазақстан Ұлттық Олимпиада комитетінің мәліметінше, мәселе спортшының кроссовкасына байланысты туындаған. World Athletics Токсанбаева киген аяқкиім үлгісінің рұқсат етілген тізімге кіретінін тексерді.
Кейін Токсанбаева Instagram Stories парақшасында нәтижесінің жойылғанын хабарлады. Қолда бар мәлімет бойынша, бұған аяқкиім табанының белгіленген талапқа сай келмеуі себеп болуы мүмкін. Кейбір ақпарат көздері табан биіктігі рұқсат етілген мөлшерден төрт миллиметрге артық болғанын жазды. Алайда ұйымдастырушылардың нақты түсіндірмесі бар ресми шешімі әзірге жарияланған жоқ.
Спортшы жанкүйерлері мен командасына қолдау көрсеткені үшін алғыс айтты. Сондай-ақ қайта оралып, жоғары нәтижесін тағы да дәлелдеуге ниетті екенін жеткізді.
Токсанбаеваның нәтижесі жойылғаннан кейін бірінші орын Қытай спортшысына берілді.
