Бали аралында жанармай жеткізудегі іркіліс тұрғындар мен туристерге қиындық туғызды. Денпасар, Кута және өзге де аудандарда жұмыс істеп тұрған бекеттердің алдында ұзын-сонар кезек пайда болған.
Индонезиялық БАҚ мәліметінше, бірқатар бекетте Pertalite және Pertamax маркалы жанармай таусылған. Әсіресе Джембрана ауданында жағдай күрделі. Мұнда 14 жанармай құю бекетінде тапшылық байқалған.
Кейбір жүргізушілер бірнеше бекетті араласа да, жанармай таба алмаған. Тіпті отыны таусылған мотоциклдерін қолмен итеруге мәжбүр болғандар бар. Жұмыс істеп тұрған бекеттерде кезек күту уақыты бір сағаттан асқан. Көліктердің көп жиналуы жол қозғалысын да қиындатқан.
Тапшылықтың негізгі себептерінің бірі — жанармай тасымалдайтын танкерлердің кешігуі. Теңіз арқылы жеткізілетін отын уақытында келмегендіктен, бірқатар бекеттегі қор сарқыла бастаған.
Жергілікті билік пен полиция жанармай құю бекеттерінің маңындағы қозғалысты бақылауды күшейтті. Ал жанармай жеткізуші Pertamina компаниясы тапшылықты азайту үшін қосымша отын жөнелтілетінін хабарлаған.
