Бақытжан Базарбек қуанышты жаңалығын Facebook парақшасында бөлісіп, өзіне қолдау көрсеткен қазақстандықтарға алғыс айтты. Ол депутат болып жүрген кезінде биліктің емес, халықтың мүддесін қорғауға тырысқанын жеткізді.
«Биліктің сүйіктісі болмасам да, халықтың сүйіктісі болуға тырыстым. Осы жолда талай сынақтан өттім. Бірақ халқымның мүддесі әрдайым жүрегімде болды», – деп жазды Базарбек.
Бұрынғы депутаттың айтуынша, бұл марапаттың орны ерекше. Өйткені ол өз еңбегіне халықтың берген бағасы деп есептейді. Дегенмен Базарбек үшін атақ пен марапаттан гөрі атқарылған жұмыстың нәтижесі маңызды. Ол депутат қызметінің тиімділігі халықтың тұрмысын жақсартуға, жемқорлықты азайтуға және әділетті қоғам құруға қаншалықты үлес қосқанымен өлшенуі керек деп санайды.
Бақытжан Базарбек бұл аталымда алғаш рет жеңіске жетіп отырған жоқ. 2023 жылы ол қазіргі оқу-ағарту министрі Жұлдыз Сүлейменовамен бірге үздік депутат атанған. Ал 2024 және 2025 жылдары сыйлықтың финалына дейін жеткен.
Саясаткер депутаттық қызметі кезінде заң үстемдігін нығайтуға және әділдік орнатуға бағытталған барлық бастамасын жүзеге асырып үлгермегенін де жасырмады. Соған қарамастан, алдағы уақытта жаңа Құрылтай депутаттарымен бірлесіп, заңнамалық бастамалар бойынша жұмысын жалғастыруға ниетті екенін айтты.
Айта кетейік, Бақытжан Базарбек жаңа Құрылтай сайлауына қатысатын партиялық тізімге енбей, Парламенттен кеткен болатын. Соған қарамастан, ол халықтың дауыс беруі арқылы анықталатын ұлттық сыйлықтың жеңімпазы атанды.
