Астанада өткен Орталық Азия елдерінің Бала құқықтары жөніндегі уәкілдерінің «Балалар үні: ұлттық стратегиялар және қауіпсіз цифрлық орта» атты II Халықаралық форумында «Қазақстан балалары» атты жаңа депутаттық топтың жұмысы басталғаны мәлімделді. Бұл маңызды ұйымның тізгінін Құрылтай депутаты Дана Медеуова ұстады.
Медеуованың айтуынша, топтың басты мақсаты – балалардың құқықтарын, қауіпсіздігін, денсаулығы мен амандығын қорғау мәселелері заң шығару жұмысының қақ ортасында болуы үшін парламентарийлердің күш-жігерін біріктіру.
Құрылтайдың вице-спикері Динара Зәкиеваның төрағалығымен өткен ауқымды жиында қатысушылар балаларды интернетте қорғау, заманауи технологиялардың олардың дамуына тигізетін әсері және білім алуда, соның ішінде ерекше қажеттіліктері бар балалар үшін тең мүмкіндіктер жасау мәселелерін кеңінен талқылады.
Форум жұмысына Премьер-министрдің орынбасары – Жасанды интеллект және цифрлық даму министри Жаслан Мәдиев, Оқу-ағарту министрі Жұлдыз Сүлейменова, БҰҰ Бас хатшысының балаларға қарсы зорлық-зомбылық мәселелері жөніндегі арнайы өкілі Наджат Маалла Мджид және басқа да халықаралық ұйымдардың өкілдері қатысты.
Қараша айында депутаттық топ ЮНИСЕФ өкілдерімен алғашқы бірлескен отырысын өткізуді жоспарлап отыр. Жиында алдағы жұмыстың негізгі басымдықтары мен бағыттары айқындалатын болады.
