АҚШ Президенті Дональд Трамп Қазақстан басшысы Қасым-Жомарт Тоқаевқа Республика күніне орай құттықтау жеделхатын жолдады. Онда мемлекет басшысы екіжақты қарым-қатынастардың нығая түскенін атап өтіп, ынтымақтастықты одан әрі дамытуға ниетті екенін білдірді.
Америкалық көшбасшы соңғы бір жыл ішінде екі елдің халықаралық қауіпсіздік саласындағы серіктестікті тереңдетіп, маңызды коммерциялық келісімдер жасай алғанын баса айтты.
«Өткен жылы халықаралық бейбітшілік пен қауіпсіздік саласындағы ынтымақтастықтан бастап, қос мемлекетке де пайда әкелетін айтулы коммерциялық келісімдер жасауға дейінгі серіктестігіміздің тереңдей түскенінен мақтаныш сезінемін», – делінген жеделхатта.
Сондай-ақ Трамп 1991 жылы АҚШ Қазақстанның тәуелсіздігін бірінші болып мойындағанын еске салып, Вашингтонның еліміздің егемендігі мен аумақтық тұтастығын қолдауға бекем екенін растады.
«Мемлекеттеріміз арасындағы беки түскен достық алдағы онжылдықтар бойы нақты нәтижелер беретініне сенімдімін. Желтоқсан айында өтетін G20 саммитінде сізбен кездесуді асыға күтемін», – деді АҚШ президенті өз хатында.
