Таңертең сарбаздың ата-анасы ұлының судан өз күшімен шыққанын айтты. Алайда содан кейін ол қаза тапқан досын тағы жарты сағатқа жуық іздеген.
Кейін әлеуметтік желілерде Темірханның ауруханада түскен суреті жарияланды. Фотода ол қаза тапқан қаруласы Азамат Мадиханның беретін ұстап отыр.
Желі қолданушыларының айтуынша, Темірхан беретті қолынан тастамай, оны досының ата-анасына өзі табыстағысы келетінін айтқан.
Бұл оқиға әлеуметтік желіде үлкен әсер туғызды. Қолданушылар әскери қызметшінің жағдайына алаңдап, басынан өткерген ауыр жағдайдан кейін оны жалғыз қалдырмауға шақырды.
«Оны бір сәтке де жалғыз қалдырмаңыздар. Қазір жауап алу басталуы мүмкін», — деп жазды желі қолданушыларының бірі.
Тағы бір қолданушы Темірханнан оқиғаның мән-жайын сұрау керектігін айтты:
«Қай командир бұйрық берді? Құтқару кеудешелері болды ма, жоқ па?»
«Ол өзі ғажайыптың күшімен аман қалып, тағы жарты сағат досын іздеген. Сол сәттерде не сезінгенін елестетудің өзі қорқынышты», — деп жазды тағы бір қолданушы.
Азамат Мадихан Каспийдегі оқу-жаттығу кезінде қаза тапқан әскери қызметшілердің ресми тізімінде бар.
