Мұндай бастама көтерілген елдердің бірі — Норвегия. Онда Ray-Ban Meta көзілдірігін саябақтарда, жағажайларда, музейлер мен сауда орталықтарында, мектептер мен балабақшаларда, медициналық мекемелерде, спорт залдарында және көпшілік іс-шараларда уақытша шектеу ұсынылды.
Норвегия билігі адамдар өздерін еркін сезінетін қоғамдық орындарда жасырын түсірілімнен қауіптенбеуі керек деп есептейді. Тиісті заң жобасын Жұмысшы партиясы ұсынбақ. Құжаттың қабылдануы үшін басқа саяси күштердің де қолдауы қажет.
Францияда да «ақылды» көзілдіріктерге қатысты мәселе ушыға түсті. Балалардың құқығын қорғайтын e-Enfance ұйымына әйелдерді рұқсатсыз видеоға түсіруге байланысты шамамен 20 шағым түскен. Кейбір видеолар кейін әлеуметтік желілерде жарияланып, келемеж және қорлайтын пікірлермен тараған.
Бұл жағдайларды Париж прокуратурасы тексеріп жатыр.
Ray-Ban Meta сырттай қарапайым көзілдірікке ұқсайды. Алайда оның жақтауына камера, микрофон және динамиктер орнатылған. Құрылғы смартфонды қолға алмай-ақ, адамның көріп тұрғанын фотоға немесе видеоға түсіруге мүмкіндік береді. Дәл осы мүмкіндік жеке өмірге қол сұғу және адамдарды келісімінсіз камераға түсіру мәселесіне қатысты алаңдаушылықты күшейтті.
