Оқиға музыкалық кештің соңына таман болған. Куәгерлердің Threads әлеуметтік желісінде айтуынша, алкогольдік ішімдік ішкен болуы мүмкін екі әйел артқы қатардан сахнаға қарай басқа көрермендерді итеріп, күшпен бұзып өткен.
Бірінші қатардан орын алу үшін бірнеше сағат кезекте тұрған жәбірленушілердің сөзінше, тәртіп бұзған әйелдер жұртты итеріп қана қоймай, өзге қыздардың шашынан жұлып, жұдырық ала жүгірген. Куәгерлер жанжал шығарушылардың қарсыластарына: «Мен сенің анаңмен құрдаспын, ұялмайсың ба?» деп айқайлағанын жеткізді.
Залдағы бұл бассыздық Валерий Меладзенің де назарынан тыс қалмады. Желіде тараған кадрлардан әншінің наразылық білдіріп, әнді тоқтатып, көрермендерге сөз арнағанын көруге болады. Бір кезде ол тіпті концерттің аяқталғанын айтып, сахнадан кетіп қалмақ болған.
Алайда көпшілік әншіден қалуын өтінді. Меладзе біреудің басқаларға күш қолданғанын тағы көрсе, концертті сол сәтте тоқтататынын қатаң ескертіп, өнер көрсетуін жалғастырды. Нәтижесінде күзетшілер жанжал шығарған әйелдерді залдан шығарып жіберді.
