Францияда өмір сүру құнының қымбаттауына халықтың наразылығынан туындаған кезекті жаппай ереуілдер толқыны өтті, деп хабарлайды SHYNDYK.KZ. Шеруге қатысушылар баспана, азық-түлік және жанармай бағасының шарықтап кетуіне қатаң қарсылық білдіріп, үкіметтен қолжетімді әрі сапалы білім беруді талап етіп отыр.
Түрлі бағалаулар бойынша, бүкіл ел аумағындағы көше акцияларына 400 мыңнан 800 мыңға дейін адам қатысқан. Бұл шерулер азаматтардың күнделікті шығындарының артуына байланысты басталған наразылық толқынының жалғасы болып табылады.
Сенбі күні кешке Париждегі шерулер тәртіп сақшыларымен қақтығысқа ұласты. Наразылық білдірушілерді тарату үшін полиция көз жас ағызатын газ бен су шашатын көліктерді қолдануға мәжбүр болды. Айта кетейік, билік тәртіпсіздіктердің алдын алу мақсатында жаппай іс-шаралар өткізуге бірқатар шектеулер енгізгенімен, бұл шаралар наразы халықты тоқтата алмады.
