Француздық БАҚ мәліметінше, кибершабуыл EFS-тің жүзге жуық нысанының үшеуіне жасалған. Зардап шеккен базалардың барлығына бір ғана мердігер қызмет көрсеткен. Хакерлер жүйеге қашықтан қосылып, науқастарға құюға арналған донорлық қан мен плазма қорлары сақталатын камераларды барынша ысытып жіберуге тырысқан.
Қызмет өкілдері температуралық ауытқулар дер кезінде байқалып, жабдық жедел түрде бақылауға алынғанын атап өтті. Францияның Денсаулық сақтау министрлігі шабуылға ұшыраған тоңазытқыштарға қашықтан қосылу мүмкіндігі толық бұғатталғанын растады.
Ведомство жабдықтың нақты қандай деңгейге дейін қызып үлгергенін нақтыламай, тек «өте жоғары температура» деген сөзбен шектелді. Қазіргі уақытта хакерлердің кім екені, сондай-ақ оларды донорлық қан қорларын жоюға қандай мақсат итермелегені белгісіз.
