Кәсіподақтардың мәліметінше, ел бойынша наразылық акцияларына шамамен 1,6 миллион адам қатысқан. Ал билік шеруге шыққандардың санын 600 мыңға жуық деп бағалады. Кемінде 448 адам ұсталып, 53 полиция қызметкері жарақат алғаны хабарланды.
Парижде наразылық білдірушілер Республика алаңына жиналып, кейін Ұлт алаңына қарай шерумен жүрді. Олардың қатарында белгілі француз саясаткерлері Жан-Люк Меланшон, Марин Тонделье және Рафаэль Глюксманн болды. Ұйымдастырушылардың есебінше, ел астанасындағы шеруге 350 мыңға дейін адам қатысқан.
Кәсіподақтар ұйымдастырған наразылықтарға студенттер, мектеп оқушылары және «сары жилеттілер» қозғалысының өкілдері де қосылды. Ереуілдер білім беру мекемелері мен мемлекеттік сектордың жұмысына әсер етті. Жарияланған мәліметтерге сәйкес, орта мектептердің шамамен үштен бірі жұмысын тоқтатқан. Ал мемлекеттік қызметкерлердің 10 пайызға жуығы жұмысқа шықпаған.
Марсель, Лион, Бордо, Страсбург, Нант, Ренн, Тулуза және басқа да қалаларда шерушілер мен полиция арасында қақтығыстар болды. Сондай-ақ 86 жерде өрт қою оқиғасы тіркелгені хабарланды.
Елдегі жаппай наразылықтар аясында Франция премьер-министрі Себастьен Лекорню 9 қарашада арнайы конференция өткізілетінін мәлімдеді. Жиында шеруге қатысушылардың талаптарын талқылау жоспарланып отыр.
