Қайғылы оқиғадан кейін қазақстандықтар болған жағдайды Threads әлеуметтік желісінде белсенді талқылай бастады. Кейбір қолданушылар Каспийдегі жағдай туралы жазба жариялағаннан кейін оларға қоңырау шалып, жазбаларын өшіруді сұрағанын мәлімдеді.
Бірқатар қолданушы полиция қызметкерлерінің үйлеріне келгенін де жазды. Олар сөздеріне дәлел ретінде аудиожазбалар мен видеоүндеулер жариялады.
Талқылауға Қырғызстан қолданушылары да қосылды. Олар қазақстандықтарға жазбаларын өшіру талап етілген жағдайда, материалдарды өздеріне жіберуді ұсынды. Қырғызстандық қолданушылар ақпаратты өз парақшаларында жариялауға дайын екенін жеткізді.
SHYNDYK.KZ редакциясы осы ақпаратқа байланысты Қазақстанның Ішкі істер министрлігіне жүгінді. Ведомство әлеуметтік желіде тараған мәліметті жоққа шығарды.
«Бұл ақпарат шындыққа жанаспайды», — деп хабарлады ІІМ редакцияға.
Осыған дейін полицияның қоңырау шалғаны және қолданушылардың үйлеріне барғаны туралы мәлімдемелер Threads-та кеңінен таралып, қызу талқыланған еді.
