Редакциямен сөйлескен қазақстандықтардың айтуынша, Калифорния тұрғындары ауызсу, ұзақ сақталатын азық-түлік пен күнделікті қажетті тауарларды көбірек сатып ала бастаған. Кейбірі қақтығыс ушыға түскен жағдайда жанармай жеткізуде іркіліс болуы мүмкін деп қауіптеніп, көліктерінің багын алдын ала толтырып жүр. Сондай-ақ жеке қауіпсіздігін қамтамасыз ету мақсатында атыс қаруы мен оқ-дәрі сатып алып жатқандар да бар.
Қару-жарақ сатып алуға қызығушылықтың артқаны статистикадан да байқалады. АҚШ-тың Ұлттық ату спорты қорының (NSSF) мәліметінше, 2026 жылғы қазанда қару сатып алушыларға қатысты түзетілген тексерулер саны 1,4 миллионға жеткен. Бұл өткен жылдың сәйкес кезеңімен салыстырғанда 7,9 пайызға көп. Дегенмен аталған өсімнің Иран төңірегіндегі жағдаймен тікелей байланысты екені дәлелденген жоқ.
Энергетика нарығындағы жағдай да алаңдаушылық туғызып отыр. Калифорнияның жанармай инфрақұрылымындағы ерекшеліктері мен сырттан жеткізілетін мұнай өнімдеріне тәуелділігі штаттың жеткізілімдегі іркілістерге осал екенін көрсетеді. Ал Ормуз бұғазы арқылы кеме қатынасына шектеу қойылса, бұл әлемдік мұнай нарығына және жанармай бағасына әсер етуі мүмкін.
Осы тұста АҚШ Қорғаныс министрлігі әскери инфрақұрылымды нығайтуға және стратегиялық қор қалыптастыруға бағытталған FORTRESS бағдарламасын жүзеге асырып жатыр. Бағдарлама әскери нысандарды дербес электр қуаты көздерімен, жанармай, су, оқ-дәрі және басқа да қажетті ресурстармен қамтамасыз етуді көздейді. Америкалық БАҚ мәліметінше, қарастырылып жатқан мақсаттардың бірі — әскери базалардың 90 күнге дейін сыртқы қамтамасыз етусіз жұмыс істей алуына жағдай жасау.
Дегенмен Калифорниядағы қазақстандықтардың айтқандары бүкіл АҚШ халқы ұзаққа созылатын дағдарысқа жаппай дайындалып жатыр дегенді білдірмейді. Сондай-ақ америкалық билік тұрғындарға үш айға жететін азық-түлік пен ауызсу қорын міндетті түрде жинауды тапсырған жоқ.
