Инфекцияның Қазақстан аумағына таралу қаупі әзірге төмен деп бағаланып отыр. Бұл туралы Ресейдің Иркутск облысында аса қауіпті дерт жұқтыру фактісі мүмкін деген қауесеттен кейін SHYNDYK.KZ редакциясы жолдаған ресми сауалға ҚР Денсаулық сақтау министрлігі жауап берді.
Құзырлы орган жағдайды жіті бақылауда ұстап отыр. Мемлекеттік шекарадағы барлық өткізу пункттерінде санитариялық-карантиндік қадағалау жүргізілуде. Қазіргі таңда көліктің барлық түрі бойынша дене қызуы көтерілген, дерті білінген немесе аса қауіпті инфекцияға күдік тудырған бірде-бір жолаушы тіркелген жоқ.
Ал Ресей тарапында эпидемиологиялық тексеріс әлі жалғасуда: мамандар сырқаттың шығу тегі мен оның қалай жұққанын анықтап жатыр.
Нақты диагноз әзірге толық бекітілмеді. Бұған дейін Роспотребнадзор Иркутск облысында оба дерті анықталмағанын айтып, қайтыс болған 28 жастағы әйелдің өліміне шығу себебі белгісіз пневмония әкеп соқтырғанын хабарлаған болатын.
Қазір марқұммен байланыста болған 197 адам дәрігерлердің жіті бақылауына алынды. Олардың бойында сырқат белгілері байқалмаған, зертханалық сынамалардың барлығы теріс нәтиже көрсетті. Бүгінде Шелехов аудандық ауруханасында қажетті эпидемияға қарсы кешенді іс-шаралар жүргізіліп жатыр.
Қазақстанның Денсаулық сақтау министрлігі азаматтарды дүрбелеңге салынбай, тек ресми дереккөздерге сүйенуге шақырады.
