Қазақстандық кәсіпкер, «Қайрат» футбол клубының бақылау кеңесінің төрағасы Қайрат Боранбаевтың Лондонда өткен «Алтын доп» марапаттау рәсіміне қатысуы қоғам назарын аударды. Бұған дейін қылмыстық іс бойынша сотталған кәсіпкердің шетелге қандай негізде шығып жүргені жөнінде сұрақтар туындады.
Осыған байланысты SHYNDYK.KZ редакциясы Қазақстан Республикасы Ішкі істер министрлігінің Қылмыстық-атқару жүйесі комитетіне ресми сауал жолдады.
Ведомствоның мәліметінше, Қайрат Боранбаев бұған дейін бас бостандығын шектеу жазасын өтеп, пробация қызметінің есебінде тұрған.
Кейін кәсіпкер Қазақстан Республикасы Қылмыстық кодексінің 72-бабына сәйкес жазасының өтелмеген бөлігінен мерзімінен бұрын шартты түрде босату туралы сотқа өтінішхат берген. Сот оның өтінішін қанағаттандырған.
Сот шешімінің негізінде Боранбаев жазасын одан әрі өтеуден мерзімінен бұрын шартты түрде босатылып, пробация қызметінің есебінен шығарылған.
«Қазіргі уақытта оған қатысты аталған жазаны өтеуге және пробация қызметінің бақылауына байланысты шектеулер жоқ», – деп хабарлады Қылмыстық-атқару жүйесі комитеті.
Осылайша, ведомствоның түсіндіруінше, Боранбаевтың шетелге сапарлары бұрын тағайындалған жазаны өтеуге байланысты шектеулерді бұзу болып саналмайды. Өйткені қазіргі уақытта оған қатысты мұндай шектеулер қолданылмайды.
Дегенмен ҚАЖК жауабында тек жазаны өтеу және пробациялық бақылау аясындағы шектеулер туралы айтылған. Кәсіпкердің шетелге шығуына қатысты өзге де шектеулердің бар-жоғы жөнінде мәлімет берілмеген.
