Абай облысының әкімі Берік Уәли «Абай Ақпарат» веб-ресурсының бас редакторы, 23 жастағы Замира Мурсалимоваға «Ерен еңбегі үшін» медалін табыстады. Алайда бұл жаңалық қоғамда құттықтаудан гөрі өткір сын мен келеңсіз пікірлердің тууына себеп болды, деп хабарлайды SHYNDYK.KZ.
Желі қолданушылары жас журналистің қысқа ғана уақыт ішінде мемлекеттік деңгейде мойындалатындай қандай ауыз толтырып айтарлықтай жетістікке жеткенін түсіндіруді талап етіп жатыр. Пікір қалдырушылардың бірі: «Қандай еңбегі үшін? Кеше ғана оқуын бітірген қыз қандай үлес қосып үлгерді?» деп ашынса, енді бірі бұл жағдайды 30-40 жыл бойы табан ақы, маңдай терімен еңбек етіп, ешқандай марапат көрмеген қарапайым мамандардың жағдайымен салыстырған.
Ашық дереккөздерде Мурсалимованың университетті небәрі екі жыл бұрын ғана аяқтағаны туралы ақпараттың болуы жұрттың ашуына тиді. Көпшілік мұндай түсініксіз шешімдердің кесірінен мемлекеттік марапаттардың қадірі мен құндылығы қашып бара жатқанын айтып дабыл қағуда.
Әрине, жас маманның да елеулі табыстарға жетуі әбден мүмкін, бірақ қоғам сол жетістіктердің нақты қандай екенін, оның қандай жобаларды жүзеге асырғанын білгісі келеді. Талқылау барысында желі қолданушылары жақында ғана дәл осындай марапатқа ие болған алматылық блогер Анара Батырханды да еске алып, үміткерлерді іріктеудің жалпы критерийлеріне күмән келтірген. Тіпті, Мурсалимованың ықпалды адамдармен байланысы болуы мүмкін деген түрлі қауесеттер де тарап үлгерді. Дегенмен, бұл пікірлердің ешқайсысы әзірге нақты дәлелденбеген.
Нақты негіздеменің жоқтығы түрлі алыпқашпа сөздерге жол ашып отыр. Мемлекеттік медаль — салтанатты жиында үлестіретін жай ғана кәдесый емес, ол нақты еңбекті мойындаудың белгісі. Сондықтан Абай облысының әкімдігі журналистің кандидатурасын кім ұсынғанын, марапаттау құжаттарына оның қандай жетістіктері енгізілгенін және бұл шешімнің немен негізделгенін халыққа ашық әрі түсінікті түрде түсіндіруі тиіс. Қазақстандықтар салтанатты шараның суретін ғана емес, марапат иесінің атқарған қызметі мен нақты еңбегі туралы толыққанды ақпарат күтеді.
