Бакуге жасаған жұмыс сапары аясында Қазақстан Президенті Қасым-Жомарт Тоқаев Әзербайжан Президенті Ильхам Әлиевпен кездесті. Сапардың басты оқиғасы — Қазақстан мен Әзербайжанды Каспий теңізінің түбі арқылы тікелей байланыстыратын Транскаспийлік талшықты-оптикалық байланыс желісінің (ТОБЖ) ресми ашылуы болды, деп хабарлайды SHYNDYK.KZ.
Суасты кабелінің ұзындығы 380 шақырымды құрайды. Бұл стратегиялық жобаны қазақстандық «Қазақтелеком» АҚ мен әзербайжандық AzerTelecom компаниясы бірлесіп жүзеге асырды. Жаңа цифрлық бағыт Қазақстанды, Орталық Азия елдері мен Қытайды Еуропамен байланыстыратын маңызды телекоммуникациялық артерияға айналады. Тоқаев бұл жобаны Орта дәліздің цифрлық бейнесі деп бағаласа, Әлиев жаңа инфрақұрылымның өңірлер арасындағы интеграцияны күшейтетінін атап өтті.
Кездесуде қос мемлекет басшылары екіжақты тауар айналымын 1 млрд долларға жеткізу ниетін нақтылады. Сондай-ақ қазақстандық энергия ресурстарын Әзербайжан арқылы тасымалдау және өнеркәсіп, көлік-логистика және ауыл шаруашылығы салаларындағы ынтымақтастық кеңінен талқыланды. Сонымен қатар Транскаспий халықаралық көлік дәлізін (ТХКД) дамыту, тасымалды цифрландыру және логистикалық кедергілерді жою туралы маңызды келісімге қол қойылды.
Әзербайжандағы іс-шаралардан соң Мемлекет басшысы Қасым-Жомарт Тоқаев Армения премьер-министрі Никол Пашинянның шақыруымен Ереванға келді. Мұнда Президент COP17 аясында өтіп жатқан Биоалуантүрлілік жөніндегі көшбасшылар саммитіне қатысады. Оның қарсаңында Тоқаев Карен Демирчян атындағы кешенде ұйымдастырылған ғаламшардың табиғи байлығын сақтауға арналған саммиттің салтанатты ашылу рәсіміне қатысты.
