Қазақстан Президенті Қасым-Жомарт Тоқаев Қаржы нарығын реттеу және дамыту агенттігінің төрағасы Мадина Әбілқасымованы қабылдады.
Кездесуде 2026 жылдың алғашқы сегіз айындағы қаржы нарығының жұмысы талқыланды. Агенттік төрағасының мәліметінше, осы кезеңде банктердің активтері 6,9%-ға өсіп, 75,6 трлн теңгеге жеткен. Банктердің капиталының жеткіліктілік көрсеткіші 20,7%-ды құрады.
Есепті кезеңде агенттік 279 инспекциялық тексеру жүргізіп, 190 қадағалау шарасын қолданған. Сонымен қатар жалпы сомасы 465 млн теңге көлемінде айыппұл салынған. Микроқаржы және коллекторлық қызмет көрсету нарығында 13 ұйым лицензиясынан айырылды.
Бизнесті несиелендіру көлемі 3,5%-ға өсіп, 16 трлн теңгеге жеткен. Ал тұтынушылық несиелердің өсу қарқыны 4,6%-ға дейін баяулаған.
Мадина Әбілқасымова проблемалық қарыздарды бірлесіп реттеуге арналған Finkelisimkz платформасының іске қосылғанын хабарлады. Сондай-ақ жыл соңына дейін Бірыңғай қаржы омбудсмені кеңсесін ашу жоспарланып отырғанын айтты.
Кездесуде қаржы секторын цифрландыру мәселесі де қаралды. Агенттік жасанды интеллект технологияларын пайдалана отырып, FinAI қадағалау платформасын әзірлеген.
Кездесу қорытындысы бойынша Қасым-Жомарт Тоқаев қаржылық тұрақтылықты нығайту, қаржы саласында жасанды интеллектіні дамыту, экономиканың нақты секторын несиелендіруді кеңейту, сондай-ақ капитал нарығы мен сақтандыру саласын дамыту жөнінде бірқатар тапсырма берді.
