Қазақстан Президенті Қасым-Жомарт Тоқаев Сеулде өткен алғашқы «Орталық Азия – Корея Республикасы» саммитінде «Орталық Азия – Корея» өнеркәсіптік және технологиялық даму серіктестігін іске қосуды ұсынды.
Мемлекет басшысының айтуынша, жаңа тетік аясында Орталық Азия елдерінің үкіметтері Кореямен бірлесіп жүзеге асырылатын жобалардың портфелін қалыптастыра алады. Негізгі бағыттардың қатарында өндірісті жергіліктендіру, технология трансфері, өңірлік өнеркәсіптік кооперация және дайын өнімді үшінші елдердің нарықтарына шығару бар.
Қасым-Жомарт Тоқаев сауда-экономикалық және инвестициялық байланыстар екіжақты әрі өңірлік ынтымақтастықтың негізгі бағыттарының бірі болып қала беретінін атап өтті.
Өткен жылы Орталық Азия мен Корея арасындағы сауда айналымы алғаш рет 10 миллиард доллардан асқан. Оның шамамен жартысы Қазақстанның үлесіне тиесілі.
Президенттің мәліметінше, бүгінде Қазақстанда кореялық капиталдың қатысуымен мыңнан астам бірлескен кәсіпорын жұмыс істейді. Ал Кореяның Қазақстан экономикасына салған инвестицияларының жалпы көлемі 12 миллиард доллардан асқан.
Мемлекет басшысы қазіргі сапар аясында жалпы құны шамамен 19 миллиард доллар болатын коммерциялық келісімдерге қол қойылғанын айтты.
«Бүгінде екіжақты ынтымақтастық жаңа деңгейге көтеріліп отыр. Сапар аясында жалпы құны шамамен 19 миллиард доллар болатын коммерциялық келісімдерге қол қойылды. Бұл – экономикалық өзара іс-қимылымыздың жоғары қарқынының айқын көрсеткіші», – деді Қасым-Жомарт Тоқаев.
Президент өнеркәсіптік кооперацияның нақты мысалы ретінде жылына 70 мың автомобиль шығаруға қауқарлы KIA Qazaqstan зауытын атады. Кәсіпорынның айналасында өндірістік кластер қалыптасып келеді.
Қасым-Жомарт Тоқаев Орталық Азия мен Корея арасындағы алғашқы саммитті ұйымдастырған Корея Президенті Ли Чжэ Мёнға алғыс білдіріп, бұл кездесуді тарихи оқиға деп атады.
