12–13 қыркүйекте Мемлекет басшысы Үндістан премьер-министрі Нарендра Модидің шақыруымен XVIII BRICS саммитіне қатысу үшін Нью-Делиге жұмыс сапарымен барады.
Саммит аясында Қасым-Жомарт Тоқаев «BRICS+» форматындағы пленарлық отырыста сөз сөйлейді. Жиында тұрақтылықты нығайту, инновация, ынтымақтастық және орнықты даму мәселелері талқыланады.
Сондай-ақ Қазақстан Президентінің Нарендра Модимен келіссөздер жүргізіп, бірқатар мемлекет пен үкімет басшыларымен кездесуі жоспарланған.
14–16 қыркүйекте Қасым-Жомарт Тоқаев Оңтүстік Корея президенті Ли Чжэ Мённың шақыруымен бұл елге мемлекеттік сапармен барады.
15 қыркүйекте Сеулде екі ел көшбасшыларының келіссөздері өтеді. Кездесуде Қазақстан мен Оңтүстік Корея арасындағы кеңейтілген стратегиялық әріптестікті одан әрі дамыту мәселелері қаралады.
Президент сондай-ақ Оңтүстік Кореяның жетекші компанияларының басшыларымен кездеседі.
16 қыркүйекте Қасым-Жомарт Тоқаев алғашқы «Орталық Азия – Корея Республикасы» саммитіне қатысады.
