2018 жылғы маусымда Рыбакина Қазақстан атынан өнер көрсете бастады. Ол кезде 19 жастағы спортшы ересектер арасындағы теннисте алғашқы нәтижелеріне қол жеткізіп жүрген еді. Қазақстан теннис федерациясы оған қаржылай қолдау көрсетіп, кәсіби мансабын жалғастыруға қажетті дайындық жағдайын ұсынды.
Ол уақытта болашақ чемпионның еншісінде ірі турнирлердегі жеңістер әлі жоқ болатын. Қазақстан тарапы оның әлеуеті толық ашылмай тұрған кезде сенім білдірді.
Кейін Рыбакина Қазақстанда өзіне сенім артылғанын және жаттығуын жалғастырып, шеберлігін жетілдіруге мүмкіндік берілгенін бірнеше рет айтты. Бұл қолдау оған кәсіби жолын жоспарлап, алға қойған мақсаттарына біртіндеп ұмтылуға жол ашты.
Қазақстан туы астындағы алғашқы жеңістер
2019 жылы Рыбакина Бухарестегі турнирде WTA аясындағы алғашқы титулын жеңіп алды. Келесі маусымда Хобартта топ жарып, жарыстардың финалына жиі шыға бастады.
Оның нәтижелері біртіндеп жақсарды. Сонымен қатар әлемнің мықты теннисшілеріне қарсы ойнау тәжірибесі мен өз күшіне деген сенімі арта түсті.
2022 жылы Рыбакина Уимблдон финалында Онс Жаберді жеңіп, чемпион атанды. Осылайша, ол Үлкен дулыға турнирінің жекелей сында жеңіске жеткен алғашқы Қазақстан өкілі болды. Бұл жетістік отандық теннис тарихындағы маңызды оқиғаға айналды.
Уимблдоннан әлемдік шыңға дейінгі жол
Лондон кортындағы жеңістен кейін Рыбакинаның жетістіктері жалғасты. 2023 жылы ол Australian Open финалына дейін жетіп, кейін бірқатар ірі турнирде топ жарды.
2025 жылы Елена Рыбакина WTA қорытынды турнирінің чемпионы атанды. 2026 жылдың басында Australian Open жарысында Арина Соболенконы жеңіп, мансабындағы екінші Үлкен дулыға титулын иеленді.
Енді Рыбакина әлемдік рейтингтің бірінші сатысына шығатынына кепілдік алды. Ол ресми түрде 14 қыркүйекте әлемнің бірінші ракеткасы атанады.
Қазақстандық теннисші US Open турнирінде де финалға жолдама алды. Жартылай финалда ол Коко Гауффты 3:6, 6:4, 6:4 есебімен жеңді. Шешуші кездесуде Рыбакина Арина Соболенкоға қарсы ойнайды.
Қазақстан туы астында өнер көрсеткен сегіз жыл ішінде Рыбакина болашағынан үміт күттірген жас спортшыдан әлемдік теннистің көшбасшысына дейін өсті. Бұл жетістіктің артында оның табиғи таланты, тәртібі, тынымсыз еңбегі, командасының жұмысы және чемпиондық атақтарға жетпей тұрып-ақ қолдау көрсеткен елдің сенімі бар.
Бүгінде Рыбакинаның жеңістері қазақстандық жас теннисшілерге үлгі болып отыр. Оның жолы әлемдегі ең беделді жүлделерді Қазақстан туы астында жеңіп алуға болатынын көрсетті.
